FC Basel ka bërë të ditur se legjenda zvicerane, Stephan Lichtsteiner, do të udhëheqë ekipin e parë si trajner kryesor deri në verën e vitit 2029.

Lajmi u bë i ditur përmes një postimi në rrjetin social Facebook dhe sajtin e tyre zyrtar, shkruan Arbresh.info.

Ai do të ketë përkrah Pascal Bader si trajner ndihmës.

42-vjeçari ka një karrierë të pasur si lojtar, duke fituar 7 tituj kampionati dhe 5 kupa me Juventusin, si dhe duke luajtur mbi 100 ndeshje për kombëtaren e Zvicrës, ku ishte edhe kapiten dhe “Futbollisti i Vitit” në 2015.

Pas mbylljes së karrierës së tij aktive në 2020, Lichtsteiner ka punuar si trajner i të rinjve në FC Basel dhe skuadrat kombëtare të Zvicrës, para se të marrë drejtimin e FC Wettswil-Bonstetten në vitin 2024.

Prezantimi zyrtar për mediat do të mbahet të martën në orën 11:00 në Media Center St. Jakob-Park./Arbresh.info